يا أبوي انا آسف على كل ما صار
وانا على أمرك ولا يمكن اعصاه
الناس تخطي كلهم حكم الاقدار
والخير باللي تاب عن ذنب سواه
ما لـي أبو غيرك أنا إبنك البـار
أرجو السموحة منك ياعطر الأفواه
أنا ترى يا بوي لك سيف بتار
يكسر عيون اللي تحاول تعداه
وعدٍ علَيْ يا بوي في كل مضمار
اني لَشرّف شيبتك وارفع الجاه
مهما بخلت ارجع محاصيل وثمار
لِنّ الكرم أصلي ولا يمكن انساه
ماني بمثل اللي منافق وبــوّار
أنا من اللــي لا طلبته بتلقاه
ودي أقدم لك عيوني والابصار
رضاك عندي غايتي واتمنــاه
من غيرك اللي يشعل دروبي انوار
ويزيل عن روحي الكدر والمعاناه
مهما كتبت اشعار واشعار واشعار
ما راح أوصل حد نهرك ومجـراه
يا سيدي تفداك روحي والاعمار
وش فايدة عمري بدونك ومعناه
أدعي إله الكون علام الاسـرار
يحفظك من كيد الشياطين وأعداه
ويطيل في عمرك لنا سيد الدار
نورك يضوي كل داجي ويجلاه
ليست هناك تعليقات:
إرسال تعليق